Luk 24 | BNP | STEP | Na hatelanga pokopoko na mugana parava na vik, e huriki a ngatavine ri bole a mangisipa ri rata puru, ri bole lakea na babe.

a 24:6 Luk 9:22

b 24:21 Luk 19:11; Apo 1:6

c 24:24 Ion 20:3-10

d 24:26 Luk 9:22

e 24:27 Sng 22:1-21; Ais 53

f 24:34 1Ko 15:4-5

g 24:37 Mat 14:26

h 24:44 Luk 9:22

i 24:48 Ion 15:27; Apo 1:8

j 24:49 Ion 14:16; 15:26; Apo 1:4

Luke 24

E Isu i Pesi Rike na Matenga

(Mateo 28:1-10; Markus 16:1-8; Ioanes 20:1-10)

1 Na hatelanga pokopoko na mugana parava na vik, e huriki a ngatavine ri bole a mangisipa ri rata puru, ri bole lakea na babe. 2 Na tahuna ri bele, ri masia a kedo ni kule vuroki na matana babe. 3 Na tahuna ri dili pololilo i uka ma ri masia a podane Isu, e Bakovi Dagi. 4 Ri luhoi viliha lae. A bakovi ala rua ru rodo a varakia i para hidihidi ru bele vakaturutu, ru pesi tabukoi ne ria. 5 E huriki a ngatavine ri mangenge ri lolu puru na malala. Lakea a bakovi nga ru taki ria, ru ta maea, “I navai mu matakana a bakovi mahuri na tanga ne huriki ri mate? 6 ^aI uka ma ia koea. I pesi rike pali na matenga. Mu luhoia a ngava i taki mua vona o Galili? 7 I taki mua, i ta maea, ‘A Tuna Bakovi bara ni habi ne huriki a bakovi hale, ri paditatea na kai tavalavala. Muri, na toluna parava, bara i pesi rike mule na matenga.’”

8 Muri ri longovisi a ngavane Isu, 9 ri pe a babe, ri vano, ri vakalongo e huriki a apostolo ala ravulu a polona i taku turana e huriki a murimuri ranga. 10 Ra ngatavine nga e Maria Magdala, e Ioana, e Maria kinane Iakop, e huriki a ngatavine ranga. Ria kunana ri vano, ri vakalongo e huriki a apostolo vona a maki i bele na babe. 11 Pali e huriki a apostolo ri luhoi ta ngava tavula kunana, i uka ma ri luhoi ge muholi. 12 Pali e Petrus i pesi rike, i nunu lakea na babe. I tuku dili, i masia a lavalava ni bunu a podane Isu vona. I matai lobo, i hamule na tanga, i luhoi hatekea ra maki i bele.

E Isu i Bele na Dala Lakea o Emaus

(Markus 16:12-13)

13 Na parava iea kunana, a murimuri ala rua ru laho lakea na tanga e Emaus. Ra tanga iea i basi popote ne Ierusalem, a maravana a kilomita i ravulu a polona i taku. 14 Na tahuna ru lalaho ru tuverei na maka maki i bele. 15 Na tahuna ru vatuverei, ru vanana vona a maki i bele, e Isu i valai tabukoi ne rua i laho turane rua, 16 pali i uka ma ru matakilalea.

17 Muri e Isu i nana rua, “A ra muru vatuverei vona na dala?”

Lakea a murimuri nga ru pesi tata ru mata tangitangi. 18 A viri tara ne rua, a rana e Kleopas, i koli i ta maea, “Ioe kunana a mosi ne Ierusalem, o uka ma o lohoka vona a maki i bele vonga?”

19 E Isu i koli i ta maea, “A ra maki?”

Lakea ru ta maea, “A maki i bele ne Isu o Nasaret. Ia a propet i tahoka a nitora dagi na nitana, a nitora dagi na ni rata a nivakasiri na matana Vure, na matane huriki a bakovi, a ngatavine. 20 E huriki a matakari, a prister dagi ne mia ri habia na limane huriki a Rom, ri gi paditatea na kai tavalavala. 21 ^bPali mia mi luhoi ia ta ge korimule e huriki a Israel. Pali ngane a toluna parava. 22 Mona e huriki a ngatavine ri vakaturutu mia vona tara ngava. Baroko na hatelanga ri lakea na babe, 23 pali i uka ma ri masia vonga a podane Isu. Ri hamule ri vakalongo mia ta ri matai a agelo ala rua, ru taki ria ne Isu i mahuri mule! 24 ^cMuri e huriki ranga ne mia ri lakea na babe. Ri matai a maki i manga a ngava i taki e huriki a ngatavine, pali i uka ma ri masia e Isu.”

25 Muri e Isu i taki rua i ta maea, “Muru manga, muru maradoi hateka ni luhoi a ngava lobo i taki e huriki a propet. 26 ^dE huriki a propet ri takia e Kristo ge bole a nimadihi taro, muri ge bole a bagetuanga vona.” 27 ^eMuri i vakatubu ne Moses i valai ne huriki a propet lobo, i tuveve polo ne rua a maki lobo ni here puru mai ia na Hinere.

28 To valai tabukoi na tanga dagi e Emaus, lakea e Isu i rata manga ge laho polopolo. 29 Lakea ru takia, ru ta maea, “O made turane maria, i malunga pali a hini, i popote ge rodo.” Lakea i vano i made turane rua.

30 Na tahuna to made halui a dede ta to go kani, lakea e Isu i bolea a bret, i vasileki langa vona, i kevea i habia ne rua. 31 Ngane i malaharere a matane rua, ru matakilalea e Isu. Na tahuna ru matakilalea, i malaviriri kunana i marakavelu. 32 Lakea ru vanana, ru ta maea, “Muholi hateka, i rikerike a hatene tarua, na tahuna te lalaho na dala, i ta turane tarua, i tuveve puru ne tarua a ngava lobo na Hinere.”

33 Ru malaga malaviriri, ru hamule lakea o Ierusalem. Ru luve taho vonga e huriki a apostolo ala ravulu a polona i taku turane huriki ranga, ri vapopo vonga. 34 ^fLakea ri vakalongo rua, “Muholi hateka! E Bakovi Dagi i pesi rike mule na nimate, i vakasiria ne Simon.” 35 Muri ru vakalongo ria vona a maki i bele ne rua na dala, ru matakilalea e Isu na tahuna i keve a bret.

E Isu i Bele ne Huriki a Murimuri Vona

(Mateo 28:16-20; Markus 16:14-18; Ioanes 20:19-23)

36 Ru tabana ni tuverei, lakea e Isu i bele ne ria, i pesi na kurukurune ria, i ta maea, “A nivalemu ge turane mua.”

37 ^gRi turutu, ri mangenge, ri luhoi ta ia a hanitu. 38 Lakea e Isu i taki ria i ta maea, “I navai mu turutu? I navai mu luhoi viliha lae? 39 Mu matai a limagu a vahagu. Iau kunana! Mu nugu kilangagu. A hanitu i uka bobona a tuhana ge manga nau.”

40 E Isu i taki lobo a ngava nga, lakea i vakasiri ria vona a limana, a vahana.

41 Ri tabana ma ri luhoi kamumu, a vuhuna ri turutu ri vivi vona, lakea i taki ria, “Mu tahoka a maki ni kani koea?” 42 Lakea ri habi vona a manu ni langani. 43 E Isu i kani na matane ria a manu.

44 ^hLakea i taki ria, i ta maea, “Mu luhoi kado na tahuna a turane mua rira? A taki a maki ni here puru virihi mai iau bara i bele. Ra ngava lobo ni here puru na vinara ne Moses, na Hinere ne huriki a propet, na Linge.”

45 Muri e Isu i vakapalala a gine ria, ri gi lohoka na ngava ni here puru na Hinere. 46 Lakea e Isu i taki ria i ta maea, “A ngava ni here puru i taki e Kristo ge bole a nimadihi taro, muri na parava i tolu ge pesi rike mule na matenga. 47 Mu vakatubu o Ierusalem, mu vara na tanga lobo na malala a ngava ne huriki ri gi pulo a vilone ria, lakea a Vure ge puga vuroki a naro hale ne ria. 48 ⁱMua kunana mu matai a maka maki nga. 49 ^jIau ga rudu vilia a Hanu Kiripiripi ra i taki mua vona hosi e Tata. Mu dava iea o Ierusalem, ge harena na tahuna mu bole a nitora na Vure.”

E Isu i Sike na Hunu

(Markus 16:19-20; Apostolo 1:9-12)

50 Muri i tuli ria lakea o Betani. Na tahuna ri bele vonga, i toto rike a limana i vakabagetu ria.Jesus 51 Na tahuna i vakabagetu ria lobo, ni bole sike na hunu, i pe ria. 52 Ri kavurikea. Muri ri hamule lakea o Ierusalem ri pitei na dala. 53 Na parava vakaroro ri made na roho na Vure, ri kavurikea.